اسلامک ایجوکیشن کمیٹی کویت کی طرف سے یوتھ ونگ اسلامک ایجوکیشن کمیٹی کے اعزاز میں شاندار تقریب
Views: 2523Published on: 20-Aug-2022
اسلامک ایجوکیشن کمیٹی کویت نے سمر کیمپ کے کامیاب اختتام اور جشن آزادی پاکستان کا خوبصورت اور کامیاب پروگرام پیش کرنے پر یوتھ ونگ اسلامک ایجوکیشن کمیٹی کے اعزاز میں ساحل سمندر پر کویت کے ایک معروف ہوٹل میں پُر تکلف عشائیہ بھی دیا اور انعامات تقسیم کئے
جس میں صدر اسلامک ایجوکیشن کمیٹی کویت جناب جاوید اقبال صاحب، جنرل سیکرٹری نثار احمد خان صاحب اور تعلقات عامہ کے ذمہ دار صدف علی صدف صاحب نے خصوصی طور پر شرکت فرمائی۔ اس پر مسرت تقریب میں یوتھ ونگ کے صدر جناب نوید پاشا صاحب، نائب صدر عبد الغفار ملک صاحب، جنرل سیکرٹری حسن ارشد صاحب اور نوجوانوں کی بڑی تعداد نے شرکت کی۔ میزبانی کے فرائض ذیشان علی نے ادا کئے .
پروگرام کا آغاز جناب طلحہ رفعت نے تلاوت قرآن پاک سے کیا۔
صدر یوتھ ونگ جناب نوید پاشا صاحب نے اپنے استقبالی کلمات میں تمام نوجوانوں اور خصوصی طور پر نئے ممبران یوتھ ونگ کو خوش آمدید کہا. سمر کیمپ کے انچارج عبد الله شریف، پرنسپل حسن ارشد اور انکی ٹیم کو کامیاب سمر کیمپ کے انعقاد پر خراج تحسین پیش کیا، انہوں نے کہا کہ نوجوان مستقبل کا سرمایہ ہیں اور کسی بھی ملکی ترقی میں ریڑھ کی ہڈی کی حیثیت رکھتے ہیں۔
تعلقات عامہ کے ذمہ دار جناب صدف علی صدف صاحب نے یوتھ ونگ کے نوجوانوں سے خطاب کرتے ہوئے کہا کہ ہمارا مقصد ایک ہی ہے "نیک بنو اور نیکی پھیلاؤ" انھوں نے یوتھ ونگ کے کامیاب سمر کیمپ اور جشن آزادی پروگرام پر مبارک باد پیش کی۔
صدر اسلامک ایجوکیشن کمیٹی جناب جاوید اقبال صاحب نے اپنے خطاب میں یوتھ ونگ کے نوجوانوں کو کامیاب سمر کیمپ اور جشن آزادی تقریب پر مبارک باد پیش کی کہ جشن آزادی تقریب کویت کی تاریخ کا سب سے بڑا پروگرام پیش کیا گیا نوجوانوں کی کوششوں کو سراہا اور کہا کہ آج کل کے پُر فتن دور میں بھی ایسے نوجوان موجود ہیں جو صرف اور صرف الله کی رضا کی خاطر اپنا وقت بامقصد کاموں کے لئے صرف کرتے ہیں، یوتھ ونگ کی اس کوشش کو سراہا اور امید ظاہر کی کہ ایسے پروگرامات ہماری آئندہ نسلوں کی تربیت کے لئے بہت مفید ثابت ہوں گے اور ان ہی بچوں میں سے کل کو ایسے نوجوان نکلیں گے جو اسلام اور پاکستان کا نام روشن کریں گے.
سمرکیمپ کے أساتذة کرام جناب فیصل جمیل صاحب اور جناب یاسر شاہین صاحب کو خوبصورت شیلڈ پیش کی گئیں اور یوتھ ونگ کی پوری ٹیم کو میڈلز سے نوازا گیا۔ پروگرام کا اختتام جناب نثار احمد خان صاحب کی دعا سے ہوا جس میں انہوں نے ملک کی ترقی خوشحالی اور حاضرین کے لئے الله رب العزت کے حضور دعا فرمائی۔